المجلس اللي به اسماعيل وسعيد

ينعاف لو انه على الكبد غالي

اسماعيل ماسمته سموت الاجاويد

وسعيد ماداجو عليه الرجالي

عيالك الضمران والفرس ياسعيد

متروك ما لحميض الاطعاس والي

أنا بلاي مزهبين البواريد

هل البنادق ميتمين العيالي

مابين شمطان اللحى وألأواليد

نضت قروم فوق مثل السيالي

مركاضهم ياسعيد مابه تصديد

ذباحه الطيب نهار الكتالي

تاتيك جمعات ادروبه مواريد

تضيمنا يا سعيد بالاحتمالى

ياسعيد لاتضرب على حبة الديد

بشلفا تسل الروح بالاشتعالي

بديار فطمان البقر مرتع الصيد

ما عندك اللي عن حوالك يسالي

ياسعيد هرجك له مغير ومراديد

توقر من الهرج الرخيص الجمالي

هرج على اكتاف العذاري مناقيد

مايطيب الصبيان كود الفعالي

عرب جوابك يافتى الجود ياسعيد

عن قوله ثاري سعيد استزالي

عميت يالسبه جميع القواصيد

ماقلت بالشعار طامن وعالي

عميت نمر والمهادي وابا زيد

عز الظعن حبس الكمين الهلالي

ومشعان والطيار وعقاب وعبيد

وعبدالله المصطور ماضي الفعالي

والعسكري ومصيغ وهديب ورشيد

وحسن حماي الركاب التوالي

وجمل وبن حثلين والفغم وفهيد

وعنتر الى ما عدل الشيل مالي

وصعب اليا عدو صطام الاضاديد

وسعود ابن سعود راعي العمالي

وعرار وعمير هل الكود والكيد

مخلين سروج الخيل أو يا دوالي

وحطاب اللي بالصحن ينفض الغيد

وبريك محي بالركاب المسالي

ورميزان هو والعرفجي ذاك أبو زيد

وساجر مسوي للذلول النعالي

ابن دعيجا اللي كما بيته الحيد

وابن سمير اللي بقرن الشمالي

اللي ركابه حادرا و مسانيد

ابن دعيجا اللي يفك التوالي

ومسفر ابن غازي ونومان ياسعيد

وجارد ام لضي للشخيل العلالي

ونايف دلال مدللات المغاريد

وفهيد زبون مجنفرات المتالي

والاشمل اللي من مناه التحاميد

ومطلق مطبق بالغدير الزلالي

وجديع خيال السمان المصاعيد

مودع مع الدعثور مثل الغزالي

طبع بهم ياسعيد صدر وتوريد

وفهق وتقليط وفتل وعدالي

ياسعيد أنا ثنواي دون الأجاويد

هل الصحاف ومتعبين الدلالى

عشرين مع عشرين لاأنقص ولا أزيد

وافين من غير القصيد الافعالي

حتى انت مابك عن ربوعك مقاعيد

وأنا بعد مثلك على قد حالي

صلاة ربي عد ما هل من عيد

على شفيع الخلق عد السهالي